Perfil Asosiasaun Defisiénsia Timor-Leste (ADTL)

PERFIL ADTL

ADTL define an hanesan organizasaun sumbriña ida bá organizasaun sira ne’ebé servisu bá ema hó defisiénsia inklui organizasaun sira ne’ebé lidera husi ema hó defisiénsia, rejistu ona nu’udar membru no ativu iha sorumutu sira membru ADTL nian. Liu organizasaun 28 mak rejiztu nu’udar membru ba ADTL no kontinua funsiona hanesan fatin hodi fahe informasaun, halo koordenasaun atividade, promove edukasaun inkluzivu no lidera organizasaun membru sira hodi hala’o atividade advokasia.

Hahú ho Disability Working Group (DWG) foin iha tinan 2014 liuhusi asembleia jerál dahuluk ne’ebé hala’o iha loron 6 Dezembru iha salaun formasaun Sentru JP II, Comoro hodi dezolve DWG no transforma ba ADTL. To’o Dezembru 2022 ADTL susessu estabelese kursu sira ba edukasaun inkluzivu nian hanesan Ensinu Rekorrente faze 1 to’o faze 3, Kursu Diploma 1 Reabilitasaun Baze-Komunitária (CBR D1) iha UNTL, Kursu Bacherelato Inclusão Social e Communitaria (ICS) iha UNTL no kursu preparatóriu ba ezame ekivalénsia iha salaun ADTL. Sira ne’e hotu benefisia ona ema liu atus rua. ADTL mós susesu iha advokásia hodi muda polítika públiku ba interese aas ba ema hó defisiénsia nian ne’ebé lori ona impaktu bá Planu Asaun Nasionál bá Ema hó Defisiénsia 2021-2030, VIII governu halo ona ratifikasaun bá Konvensaun kona- bá Direitu Ema hó Defisiénsia, no muda ona persepsaun jerál no komportamentu sosiedade nian kona-ba direitu ema ho defisiénsia iha polítika públiku, asesibilidade, asesu ba saúde, edukasaun no formasaun empregu.

Vizaun

Membru sira organizadu, efetivu, ema hó defisiénsia sira-nian direitu protejidu, moris dignu, iha oportunidade hanesan no ekonómikamente independente.

Programa no atividade

1. Atendimentu ba membru liuhusi halo atendimentu regulár ba organizasaun membru sira ne’ebé hakarak hetan rejistu iha notariadu, FONGTIL, banku no mós asesu ba donor no parseiru dezenvolvimentu sira.
2. Programa ensinu rekorrente liuhusi fasilita ema ho defisiénsia sira hodi kontinua ba eskola baziku, sekundária no universitáriu.
3. Mobilizasaun membru liuhusi advokásia
4. Empoderamentu – liuhusi empoderamentu ekonómiku, desportu, arte no kultura. Ema ho defisiénsia liu ona atus tolu mak benefísia husi programa hotu ne’ebé hala’o hela ho aréa kobertura munisípiu hotu inklui RAEOA ho Atauro liuhusi parseria ho organizasaun membru sira no mós ho parseiru dezenvolvimentu sira, governu no entidade sira relevante iha rai-laran no rai-liur.